2Cor 2 | NdeIBE | STEP | Ngakho ngenza isinqumo engqondweni yami ukuba ngingenzi olunye uhambo olubuhlungu lokuza kini.

2 Corinthians 2

1 Ngakho ngenza isinqumo engqondweni yami ukuba ngingenzi olunye uhambo olubuhlungu lokuza kini. 2 Ngoba uma ngilihlupha, ngubani omunye ozangithokozisa ngaphandle kwenu lina esengilihluphile?

3 Ngaloba kanjalo ukuze kuthi lapho sengifika ngingadaniswa yilabo okumele bangithokozise. Ngangilithembile lonke, ukuba lonke lizahlanganyela lami ekuthokozeni kwami.

4 Ngoba ngalilobela ngokukhathazeka okukhulu lobuhlungu benhliziyo njalo langezinyembezi ezinengi, hatshi ukuba ngilizwise ubuhlungu kodwa ukuba ngilazise ngokuzika kothando lwami kini.

Ukuthethelelwa kwesoni

5 Uma kukhona obange usizi kalubanganga kimi, kangangokuba elubange kini lonke – uma ngingedlulisi amalawulo. 6 Isijeziso asinikwe ngabanengi simlingene. 7 Esikhundleni salokhu, kumele limthethelele njalo limduduze, ukuze angagajelwa lusizi olukhulu. 8 Ngakho ngiyalincenga ukuba liluqinise futhi uthando lwenu kuye.

9 Isizatho sokulilobela kwakuyikuba ngibone langabe lalizamelana lobunzima lilalele ezintweni zonke. 10 Uma lithethelela omunye umuntu, lami ngiyamthethelela. Njalo lokho esengikuthethelele – uma kukhona okumele kuthethelelwe – ngithethelele phambi kukaKhristu ngenxa yenu, 11 ukuze uSathane angasiqilibezeli. Ngoba amacebo akhe siyawazi.

Izisebenzi Zesivumelwano Esitsha

12 Ekuyeni kwami eThrowa ukuyatshumayela ivangeli likaKhristu njalo ngithola ukuthi iNkosi yayingivulele umnyango,

13 ngajinga ngingelakho ukuthula emoyeni wami, ngoba ngingamtholanga umzalwane wami uThithusi khona. Ngakho ngavalelisa ngasengisedlulela eMakhedoniya.

14 Kodwa-ke kabongwe uNkulunkulu, yena osikhokhela kokuphela edwendweni lokunqoba kuKhristu njalo ehlakaza ngathi ezindaweni zonke iphunga elimnandi elokumazi yena.

15 Ngoba kuNkulunkulu siliphunga elimnandi likaKhristu phakathi kwalabo abasindiswayo lalabo ababhubhayo.

16 Komunye siliphunga elibi lokufa; komunye siliphunga elimnandi lokuphila. Ngubani olingene umsebenzi lo na? 17 Thina kasihambi sithengisa ilizwi likaNkulunkulu njengabanengi. Kodwa kuKhristu siyakhuluma phambi kukaNkulunkulu ngobuqotho, njengabantu abathunywe nguNkulunkulu.